Urðarbakki 6

Háborg og Þórunn Pálsdóttir lgf kynna heillandi og mikið endurnýjað raðhús á góðum stað í neðra Breiðholti.  Fjögur svefnherbergi, þar af eitt sem nýtt er sem fjölskyldurými með útgengi út í garð, björt og rúmgóð stofa og borðstofa með útsýni og útgengi út á stórar svalir til vesturs, glæsilegt baðherbergi og gestasnyrting, þvottahús, stílhreint eldhús með góðum eldhúskrók og 20 fm bílskúr með jafnstórri gryfju undir.  Pallur bæði fyrir framan og aftan hús. Allar frekari upplýsingar gefur Þórunn Pálsdóttir lgf s:773-6000 og thorunn@haborg.is

Raðhúsið hefur undanfarin tólf ár verið mikið endurnýjað á einstaklega smekklegan hátt þar sem haldið er í upprunalegan sjarma í efnisvali og útfærslum.  Flotuð gólf, að hluta til með hitalögnum, eru klædd 4 mm lökkuðum korki, nema votrými sem eru flísalögð. Korkurinn kallast skemmtilega á við upprunalegan viðarpanel á veggjum innihurðum og í lofti. Önnur loft endurnýjuð með innfelldri lýsingu.

Gengið er inn á miðpall hússins.  Fyrir framan er fallegur forgarður með palli þar sem morgunsólar nýtur. Á vinstri hönd er bílskúrinn sem er með góðri lofthæð og gryfju undir honum öllum.  Komið er inn í anddyri með gólfhita, korki á gólfi og heillandi upprunalegum skápum.  Á vinstri hönd er rúmgott  bjart þvottahús með vinnuborði og vaski og opnanlegum glugga. Flísar á gólfi.
Inn af anddyri er bjart hol sem tengir efri og neðri hæðir í sérlega góðu flæði, en hálf hæð er niður í svefnálmu og hálf hæð upp í stofu.  Á miðpallinum er til hægri einstaklega skemmtilegt eldhús með góðum eldhúskrók.  Steinn er í borðplötu og skápapláss gott, meðal annars tveir búrskápar með aðstöðu fyrir eldhústæki.  Góður gluggi til austurs að inngangi.  Innbyggðir  sérsmíðaðir bekkir  með góðum hirslum undir eru bæði í eldhúskrók og í holi.  Gólfhiti er á millipalli nema í þvottahúsi, en á miðpalli er einnig uppgerð gestasnyrting og gott fatahengi.
Gengið er upp hálfa hæð i bjarta og glæsilega stofu með stórum vesturgluggum eftir allri hliðinni.  Heillandi upprunalegur panell er á stofuloftum og veggjum við borðstofu.  Útgengt er á vestursvalir með fallegu útsýni og kvöldsól.  Eitt gott svefnherbergi er á efsta palli.
Gengið er hálfa hæð frá miðpalli niður á neðsta pall.  Þar er gott skápapláss og þrjú góð svefnherbergi en herbergjaskipan hefur verið breytt frá upprunalegri teikningu. Milliveggur við skápa er niðurlímdur ofan á gólfefni sem auðvelt er að fjarlægja og breyta hjónaherbergi aftur skv. upprunalegri teikningu.  Beint af augum er gengið út í garðinn í gegnum fjölskylduherbergi sem lokast með rennihurð. Góður viðarpallur í garði var smíðaður árið 2021.  Baðherbergið var glæsilega endurnýjað árið 2017 og hefur tekist einkar vel að skapa ró og spa stemmningu með grænum og hvítum flísum, kork á veggjum, gólfhita, innfelldri lýsingu, bekk í kringum baðker, innbyggðum skáp, Vola blöndunartækjum og viðarsturtubotni.
Undanfarin ár hefur verið skipt um glugga og gler, botnstykki og gluggalistar verið endurnýjaðir eftir þörfum, settur nýr þakdúkur auk múrviðgerða  og málunar á útveggjum.
Sérstaklega heillandi og mikið endurnýjað raðhús á þessum vinsæla stað, þar sem stutt er í fjölbreytta þjónustu í Mjóddinni, leik- og grunnskóla auk útivistarsvæða þar sem göngu og hjólastígar eru allt um kring.
Allar frekari upplýsingar gefur Þórunn Pálsdóttir lgf.  773-6000 og thorunn@miklaborg.is